Wi snackt Platt: Rolf Zuckowski, Aquarienfrünnen un Johann D. Bellmann

Düssen Dingsdag is dat vun'e Hamborger Quickborn-Vereenigen künnig
maakt worrn: Rolf Zuckowski warrt för siene Verdeensten för de
plattdüütsche Spraak mit den Quickborn-Pries 2026 ehrt. An'n 26.
September is de Priesvergaav in Lichtwarksaal vun'e
Carl-Toepfer-Stiften. Wi graleert Rolf Zuckowski to sienen Pries un
wi snackt mit em över de plattdüütschen Leder, de he för de
Finkwarder Speeldeel schreven hett, över sien Leevde to de
plattdüütsche Spraak un över de plattdüütschen Projekten vun siene
Stiften "Kinder brauchen Musik". För Rolf Zuckowski is kloor:
Plattdüütsch deit Kinner goot - un he apelleert an'e Hamborger
Schoolpolitik: "Wi bruukt mehr Lehrinnen un Lehrers, de
Plattdüütsch snacken un lehren köönt!"

Dat is aver lang noch nich allens düsse Week bi "Wi snackt Platt",
denn wi sünd ok noch bi de "Aquarienfreunde Stellingen" to Besöök -
un dat geiht üm den Autor Johann Diedrich Bellmann: 20 Johr is dat
nu her, dat de plattdüütsche Dichtersmann un Denker in't Öller vun
76 Johr storven is. Wi besinnt uns op em.