Wi snackt Platt: Fritz-Reuter-Pries, Theater 47 un Soltmuseum

De Fritz-Reuter-Pries vun'e Carl-Toepfer-Stiften in Hamborg, de is
sowat as de Nobel-Pries för Plattdüütsch. All twee Johr warrt de
Pries utlöövt, un dütmal geiht he an den Hamborger Autor,
Översetter, Dramaturg un Regisseur Frank Grupe. Wi stellt Jo den
Priesdräger vun den mit 10.000 Euro doteerten Pries vör. Denn wi
sünd ok noch bi dat Theater 47 in Jenfeld to Besöök: dor gifft dat
vunaf den 10. April den Ohnsorg-Klassiker "Keen Utkamen mit't
Inkamen" to beleven. Dorto maakt wi ok noch en lütten Utfloog hen
na't Soltmuseum in Lümborg - un bavento vertellt Jo noch de
Vörsitter vun'n Plattdüütsch Root för Hamborg Peer-Marten Scheller,
wat dat allens bi'n Hamborger Plattdüütsch Dag an'n Sünnavend, den
18. April, to beleven gifft. Dat ganze Programm köönt Ji Jo nu ok
online ankieken - un twors op de Internetsiet vun'n Plattdüütsch
Root för Hamborg.