Bossidief im Voradfennd

Vom Låden und vom Leben Nummer 36 - Bossidief im Voradfennd (...wie
immer zum hören und mitlesen oder lesen und mithören, ganz wie ihr
wollt) Vom Låden und vom Leben (audiofile #36: Bossidief im
Voradfennd) Servus ihr Liem dord draußn Edz isses scho Nofember.
S'gehd mid grossen Schriddn auf die Adfenzzeid zu und des hässd a
dasses Jåhr bald rum is. In derre Zeid dörff oder will ich mich
eichndlich ned mid menner Glosse meld. Ich wäss, dass ich da a scho
amål a Ausnahme gmachd habb, awer zummindesd will ich käh dübbische
Meggerglosse naushau. Endschbrechnd is edz noch amål die leddzde
Schongs für so a Folche. A wemmer eichndlich in demm Momend går ned
danach is. Eichndlich würdd ich mich viel liewer bei a bår Leud
bedangg. Ågfanggd midd denne Schbrechblåsnbefüller. M Kai unnem
Gunder. Die hamm widder a schönnes Büchle abglieferd und warn a
diesmal widder so was vo sensazzionell dreu, lieb un sollidarisch,
dasze bei demm Büchle bei uns mid der Sichnierbremmiäre gschdadded
sin. Dangge saachd der Frangge. Awer a bei euch muss ich mich echd
bedangg. Weil mir ham edz immer mehr Fiedbägg auf unnere
Boddkaasds. Vo alle möchlichn Seidn. Un des führd hald umgekehrd a
widder zu meh Hörerinnen un Hörern. Also Leud, wo unnern Lådn kenne
lern oder eefach gwasi widder in schdändiche Erinnerung griech. Des
dud uns helf, weil mir brauchn euer Geld, damidd mir weidermach
könn. Also nedd bloos euer Geld, sondern eichndlich noch des, vo
viel mehr Leud. Weil reich duds hinne und vorrn ned. Awer des
wissdser ja eh, weil ich ja schdändich jammer du. Wen ich awer heud
ganz besonders lob will, des is der Bernie. Der machd nämmlich mid
seine flodde Gschbrächli was ganz bsonners und a ganz bsonners
hilfreiches. Der kombinierd Dibbs mid unnerhaldsamen Folchn UND
Inseiderwissn mid Zeuch, wo deudlich üwer unnern Dellerrand naus
geh dud. Also nadürlich dud der des ned allends mach. Der brauchd a
euch dafür. Weil genau so, könne mir ja unnererseids aus unnerer
Bedriewsblindheid a weng nauslins. Rechds und linggs vo unnere
Scheuglabbn. Awer - und deswechn ko ichn ned genuch gelobb - er
hadd des Ganze ned blos iniziierd, der dud des a moderier und
kanalisier. Ich freu mich scho jeeds mal, wenn ich a neue Folche
schneid ko, weil da sin immer Üweraschungen und Heileids drinne.
Und bei so mancher Folche habb ich nacherd gleich selwer s Lesn
ågfanggd. Beischbielsweise bei denne schwarzn Brüder, vo der Nina.
Annersch, wo ich die Büchli sch gekennd habb, is mir awer a
uffgfalle, dass da blödzlich a a Nachfraache endschdanne is. Bein
Pied zum Beschbiel. Dem Maggiawelli du ich selwer feier.
Wahrdscheins isses mir a gråd desweechn uffgfalle, dass der nacherd
a boar mal bschdelld worrn is. Üfrichns will ich mich heud a bei
derre Beedra bedangg. Wässd schö, bei derre Beedra vo der
Buchhandlung Erlesn, in Greimbühl. Die hadd nämmlich enn annern
Schnellsörvis, als wie mir. Un gråd in derre Zeid, wo d'Schul
ågfanngd hadd, un unner Schnellsörvis nedd alles rechzeidich hadd
heerschaff könn, hadd die uns mid ihrn ausgholfn. Des is so doll,
dass mer auf die Weise a rechionåle Solididarridäd un Freundschaffd
hamm, und kä Kongurenzdengn zum Vorschein kommd. Weil die hadds a
schwer mid ihrm glenne Lädle. Annerschders rum du ich mich a
neifreu, weil ich zum Beischbiel a nedde Dame, also die Fraa vonnem
liem Kundn, wo mid unnerm Soddiemend ned so viel åfangg kå, nüwer
zu ihr, also zur Beedra gschiggd habb und die dann dodål begeisderd
berichded hadd, dass des a doller Dibb wår un dasse sich im Erlesn
subber wohlgfühld und vor ållm a dodal kombedend berådn gfühld
hadd. Ich sachs ja immer. Mir hamm a ausgebrächde Kombedenz. Awer
ehm blos in unnerm Schonre. Oder unnern Schonres. Wer annersch
kennd sich wo annersch hald besser aus. Un des is genau des schönne
an so glenne Lädli. Da griggsde ehm ned blos a Kundn, die wo des
gekäffd ham, ham sich a da dafür inneressierd, sondern da griggsde
a kombedende und bersönliche Berådung. A wenn des mid derre
Berådung heud a weng aus der Mode kommn is. Ja ihr merggds scho,
ganz verkneif kå ich mer des Gschänd ned. Sanfd nei a Lobeshümne
eigebedded, awer drozdem losgworrn. Die Dendenz zu
selbsdbeschdimmdn Eekäff. Also Zielkäuf, wallmer vorher eh scho
mennd alles zum wiss, vom Inderned und so. Awer a des is a Lob
werd. Weil middlerweile ham des dodål viel Leud gschnalld, dassmer
bei uns schdressfrei a Büchli griech kå, wo mir nedd im Sordimennd
hamm oder går nedd uffm Schirm. Wie vorhin scho erwähnd,
Schulbüchli zum Beischbiel. Edz muss ich echd amål noch a weng
naachdengg. Bis edz hab ich dadsächlich fassd bloos globbd und ned
wirgglich gschänd. Nacherd hädd der Beidråch a eemso gud nei die
Adfenndszeid bassd. Wieso wolld ich des nacherd heud, unbedinggd
vorher noch unnerbring? Vielleichd habb ich langsam so a Ård
Aldersmilde endwiggld? Ich wäss es ned so genau. Eichndlich wår die
Glosse "Vom Lådn und vom Leben" dafür da, dass ich mich a weng üwer
Missschdänd, Unsiddn und sonsdichn Missd aufreech kå, ohne dasses
zu brudål wirgg dud. Und hald a a weng grübbdisch bleibd, damidds
kä KaI verschde kå und mein Beidraach aussordier als schberr kå.
Mid so emm sanfdn Gsäusl wie heud, is dess nadürlich kä Deema.
Insofern habb ich wardscheins heud des Deema oder mei Deema dodål
verfehld. Nacherd hädd ichs eefach al lass gekönnd. Weil in Franggn
gild ja die Reechl, nix gsachdd is globbd genuch. Wissdser ja.
Nacherd hab ich euch heud ganz umsonsd euer Zeid gschdoln. Hab nix
gsaachd und drodzdem ned uffghörd, mei Maul zum ardigulier. Na ja,
edz habbzer euern Dregg. Ich sehs ein, dassich versåchd hab und
verabschied mich in gewohnder Manier. Dschau, arriffidertschi euer
Gerd. Nemmds mer ned üwl und habbd a schönns Wochnend.