Ich glebb des Brroblem sin mir selber

Vom Låden und vom Leben Nummer 26 - Ich glebb des Brroblem sin mir
selber (...wie immer zum hören und mitlesen oder lesen und
mithören, ganz wie ihr wollt) Vom Låden und vom Leben (audiofile
#26: Ich glebb des Brroblem sin mir selber) Servus ihr Liem dord
drausn, ich wår ja grad zwä Wochn wech. Mei "grosser" Urlaub des
Jåhr. Deswechn hädd ich ausgruhd und endschbannd sei müss. Wår ich
wadschenns a. Nadürlich had mich der Alldåch schnell widder eighold
und zu mein Endseddzn a a gewisse Unlussd und Frussdrazion. Ich
wäss scho, dess is widder des dübbische Rummgejammer vom Gerd. Awer
auf die rebedidiefn tsünischn Kommendåre im Lådn, wenn ich a weng
ausm Nähkäsdle blauder du, will ich edz går goar ned hinarbeid. Ich
will a går nix vo mir verzähl, weil ich bin, wenn ihr des hör dud
eh scho widder unnerwegs. Essen Spielemesse. Hald a draumhafdes
Lehm. Kaum ausm Urlaub zurück scho widder im Mekka der
Schbieleszene. Und dess gleich zwä Dåche. In Hermges Romånbudig
arrbeidn is wie immer Urlaub hamm, blos besser. Was ich awer
eichndlich verzähl will, is, dass ich gråd in derre ersdn Woche, wo
mir hämmkommen sin, an Beidråch auf ARDE gsehn habb. Ja ich bin
enner vo denne ewich Gesdrichn, wo allerweil immer noch Fernseh
gugg du. Midn Saddschüssele und lineoar. Is awer edz a ned vo
Belang. In demm Beidråch gings um zwä junge Menschn, a Bärle, wo so
an arch indifidduelln, neun Lewnsweech eigschlachn hamm. Der Diddl
wår Re: der Agger wird zur Goldgrube. Die zwä wårn nimmer ganz
Jung, hamm scho schdudierd und sinn seid a boar Jåhrn
selbsdschdändich. "Deini Farms" hässd des Zauberworrd. Die zwä
wissn a echd, von was se reed du. Hamm des schdudierd und dun a
selwer Dudoriel Videos als Abos verkäff. Die Essenz draus wår, dass
die zwä midn mini Agger derård guud lehm, dasse die Woche ned mehr
wie 35 Schdundn arbett müss und mid Fünfedreissich soweid sei woll,
dasse sich zur Ruhe sedz könn oder hald eefach blos noch so viel
schaff woll, wiese Bock druff hamm. A Wahnsinn. Ausnrum gehn die
glenne Landwirdli enner nachm annern bleide, oder hörn eefach auf,
weilse kenn Debbn find, wo irchndwannamål n Bedrieb üwernemm will.
Die wo hald noch üwerbliem sin. Weil die messdn annern hamm eh scho
vor ewichn Zeidn ihr Agger verkäffd, weil sich der ganze Missd hald
blos lohn kå, wennsde grosse Flächn bewirdschaffd dusd, oder hald
an normåln Dschobb neembei mächsd und dein Agger als
Mondscheinbauer dazu. Edz sin die zwä nadürlich scho rechd schlau,
wie gsåchd glernd hammse des Zeuch eh und dann gehn die hald
zimmlich süssdemaddisch vor. Zieloriendierd und gewinnoriendierd.
Enner vo die Schbrüch is, dass der normåle Bauer hald nie auf sei
Zåhln guck dud, sondern immer eefach sei Arbeid verrichded. Die zwä
dun des viel moderner ågeh. Also souschl Midias,
Direggdvermarggdung und auf Sichd brroduzier. Ich versuch des
irchndwie zum begreif: Zu zwett aufm Agger schaff, sich selber im
Netz bewerb, Viedeos uffnemm, schneid, verdoon und vermarggdn. Die
Broduggde verkäff und verdreib, im Abo und im Direggdverkauf aufm
Hof. Des alles midn Agger, der wo a weng a besserer Schrebergaddn
is. Mid 35 Schdundn die Woche in berrfeggder Wörk Leifdeim Bällenz.
Endweeder mir annern sinn eefach kombledd verblöded und machn alles
falsch. Dann solldmer vielleichd a weng genauer nachhack und sich
dess Konzebbd nochamål under die Lube nemm und nachmach, oder des
ganze is a kombledder Unfuuch. ned, dassich des denne ned gönn
würd, awer wenn ich edz amål gugg, wieviel Aufwand mir für den
Souschl Midia Grambf, die Boddkasds, unner Veranschdaldungen und so
weider bedreim und wie viel Zeid des frissd. Zusädzlich zum normåln
Lådnbedrieb. Nacherd kann ich des nedd glebb. Folglich muss der
Haggn eefach wo annersch dranhäng. Vielleichd solld ich des a amål
brobier. Ich behaubd eefach ab edz, dass ich des endlich gschnalld
hab, wies fungzionierd. Ich schaff a blos noch die Hälfd, also so
30 Schdundn oder so, der Lådn brummd wie sau und in a boar Jåhr bin
ich soweid, dass ich kombledd aufhör kå. Und wenn dann alle fräch
du, mid welchm Zaubermiddl mir des hingegriechd hamm, nacherd mach
mer des wie mid dem Videoabo und fülln eefach irchndwelche
Zuckerkügli in glenne Döslie. Und die Dösli verkäff mer dann. Mid
den Zaubermiddl, des ja bewiesenermaßn fungzionierd. Blos griech
ich wardschenns kenn ARDE Beidråch als Werbung, sondern wenns hoch
kommd enn DeVau During oder wie die würzburcher Fernseebroffis edz
a immer heis möch. Vielleichd is des der Drigg. Möchlicherweise
sehds ihr des annersch. Für mich war des echd a Märchen und kä
redaggzioneller Beidråch. Schauz euch den Beidråch ruhig å. Oder
noch besser, verbringds euer Wochenende eefach mid was
sinnvollerem. Gehds morch nein Lådn, käfft a boar schönne Büchli
und sedzd euch zum Lesn in des schönne Wedder naus vo dem goldenen
Okdober. Dschau arrifiderdschi, euer Gerd