Sendepause

Vom Låden und vom Leben Nummer 27 - Sendepause (...wie immer zum
hören und mitlesen oder lesen und mithören, ganz wie ihr wollt) Vom
Låden und vom Leben (audiofile #27: Sendepause) Servus ihr Liem
dord drausn. Edz isses amål widder an derre Zeid, dasder mich hör
dud. Sozumsåch als so a Ård Bausenfüller. Amål was annersch. Und
was wär nacherd besser, als gleich widder mid nem Mundård Beidråch
anzumfang. Als Kondrrassd, damidsder weidere Folchn aus derre
Blauderegge noch mehr zum schätz könnd. Awer bevor ich mich ausdoob
kå, muss ich zuallererschd amål mein Baddner lob. Ich hab die
Beidräch vo denne ledzdn Wochn echd gfeierd. A goude Idee und a
dolle Sach. Euch mid nei zum bring is zwoar ned neu, awer gråd in
derre Ballung echd erfrischnd un a a Erweiderung fürn Horizond. A
für mein'. Ich hab mir bei jedm vo denne Beidräch euer Dibbs genau
unner die Luube gnommen un in mein eichenen Kosmos indegrierd. Echd
schönne Dengganstöß. Ja so Zeuch, wo mer nacherd a weng bschäfdichd
is, wo des eichene Owerschdüble a weng in Wallung kommd, sin
sozumsåch des Salz in derre Subbn. Un genau dess is mir edz a
außerhalb vo euern Dibbs un Anreechungen widder amål bassierd.
Åfang Febrruar hab ich an Beidråch auf "54books.de" vo em gwissn
"Johannes Franzen" glesn. Der Diddl war "Was auf dem Spiel steht -
Über den Untergang des Kulturjournalismus". Der Beidråch war
berfeggd gschriem und in sich dodål logisch aufbaud. Un der had mir
a weng zum schaff gemachd. Da gehds um den Unnergang vo derre
broffessionelle Kuldurgriddig. Im Föidonn, in derre Bresse un im
Allgemein. Schuld sin die Leud, wo sich gleich uffreech du, wenn
ihne so a Kriddigg ned bassd. Un dass die heud hald gleich a
gewåldiches Schbråchrohr hamm du. Bäsching sozumsåch. Außerdem sin
die Lechionen vo selbsdernanndn Hobbiekuldurkriddiggern im Inderned
nadürlich a enner vo die Gründ. Und un des is am End der
Haubdgrund, die inkombedendn, rodschdifdschwingenden, blos noch
gewinnoriendierdn Zeidunsverleecher, wo eichndlich går kä Verlecher
mehr sin, sonnern Konzernowerhäubder, ohne Sinn für die Sach. Hm.
Hörd sich an, wie wenn ich üwer die Zuschdänd bei unnern
Buchverlåchn schimbf du. Kammer ned annersch, als zuzumschdimm.
Awer nadürlich gibs a då widder unnerschiedliche Seidn un
Sichdweisn. Un wemmer a noch in annere Richdungen gugg dud, nacherd
könnd mer a an ganz annern Bliggwingl griech. Vielleichd is der
vielgebriesene Kuldurschurnalismus a efach zu lang auf em elidären
Elfenbeindurm gehoggd? Vielleichd, is heud der "normåle"
Generazionsweggsl nimmer ausreichnd? Vielleichd verändern sich
Anschbrüch, Sichdweisn und damid a Weerde schneller, wie so a
gewachsenes, edablierdes, awer a schdadisches und dräches Süsdem
reagier kå? Scho möchlich. Und auf jedn Fall begründbår und
legidiem, so a Sichd. Da will ich mich edz a goar ned ausm Fensder
leech, middenner Bewerdung. Ich gehör ja scho zum åldn Eisn. Zu
enner Generazion mid Werdn, wo heud nimmer allgemeingüldich,
geschweiche denn Hibb sin. Außerdem, un des is die Gredchenfråche,
ghör mir ja selwer zu denne Blogger un Boddkasdern un was wäss ich,
wo a schdändich ihrn Sempf abliefern, Kridigg äußern du, bewerd du
und menne, dass des, was mir dun a werdvolle Bereicherung fürs
kuldurelle Gesammde is. Mir erdreisdn uns, dübbische Medienformåde
zum nutz, wo die glassischn Medien früher a Monobol drauf ghabbd
ham. Mir machn, sozumsach Radiosendungen, mir schdelln Rezis und
Kridiggn neis Netz und mir draun uns a, a eichene Meinung zum
verdreed. Awer amål ganz ehrlich, hamm mir des Rechd dazu? Kenner
vo uns, a ned die Leud wie der Horst, der wo scho zimmlich nah
annem Brroffi is, oder der Misder Endres, der wo sogår eichndlich a
Broffi is, had a echde schurnalisdische odder germanisdische
Ausbildung oder Bildung. Ghörn mir genau zu denne Faggdoren, wo für
den Niedergang verandwordlich sin, oder sin mir endschdandn, weil
ehm im Föilletonn kenner üwer des Zeuch gschriem hadd, was wichdich
für uns is? Ich selber hab sogår enn Bresseausweis, weil ich
nachweis konnd, dass ich rechlmäßich Ardiggl bublizier du. Awer auf
welcher Seide schdeh ich, schdehn mir? Is des gerechd, wenn mir in
denne Bereichn, wos uns schding dud, also bei denne Buchverleechern
in genau des selbe Horn schdoss du un vonnem Weerdeverfall redd du,
wenn mir auf derre annern Seide möchlicherweise an genau so ennem
Asd säch du? Ich gebb kenne Andworrd und ich hab noch nedd amål
enne. A Deil vo mir denggd, dass mir des, wasmer mach scho
relladief brofessionell mach du, un dass des a Bereicherung un a
gude Ergänzung dårschdell dud. Awer auf der annern Seid, wäss ich
a, dass mer des sicher a annersch seh kå. Sogår mei Anmåsung, wenn
ich mich mid derre Glosse auf Leud beruf du, die wo ihr ganzes Lehm
brofessionell als Schurnalisdn dädich wårn. Vielleichd is des doch
ganz schö unnverschämd. Ob edz die Henne erschd da wår, oder des
Ei, werrmer ned ergründ könn. Alles is innem Wandel un es gibbd kä
absolud falsch oder richdich. Schdeebleib is sicher verkehrd, awer
alles unbedinggd durchsetz zum woll, is a kä Lösung. Die Coco
Chanel had amål gsachd: „Um unersetzbar zu sein, muss man stets
anders sein.“ Vielleichd hässd des awer ned blos, dassmer immer
annersch sei muss, als wie die annern, sondern a, dassmer erkenn
muss, dass die Zeid a a annere is, un mer sich ned ewich auf die
selbn Briwillegien verlass kå. Tja, so gehds dann in mein
Owerschdüble hin un her, des is a Aufruhr und a Wallung. Kammer ned
verglär. Muss mer selwer kenn. Awer vielleichd habd ihr sowas ja a
ab un an. Oder ich habb da edz was losdredn. Zahnrädli nei
Bewechung versedzd. Gud so. Es gibbd allerweil immer mindesdns zwä
Sichdn. Un des allends dud scho beweis, dass kenne von beidn
kombledd richdich is. Wär schö, wenn a sie, Herr Johannes Franzen
da amål drüwer nachdengg würd. A wenn ich dess, was sie gschriem
hamm und des wieses gschriem hamm durchaus werdschädz du. Desweechn
sach ich edz zu ihne, Herr Franzen und zu euch annern, a schönnes
Wochnend, denggds amål drüwer nach und dud gern a mid mir drüwer
redd. Dschau arrifiderdschi, euer Gerd