schdillgleechd

Vom Låden und vom Leben Nummer 28 - schdillgleechd (...wie immer
zum hören und mitlesen oder lesen und mithören, ganz wie ihr wollt)
Vom Låden und vom Leben (audiofile #28: schdillgleechd) Servus ihr
Liem dord drausn. Des Joahr is a weng annersch, wie die Joahr
davor. Ednfåll in Bezuch auf unnern Boddgaasd. Zum enne had der
Börn ågfanggd, sei GeBlauder rechd reechlmäßich eizumschdreu, was a
echde Bereicherung is, zum annern war da die Sach mit derre
Gschichdli, wo ihr echd gmochd habbd. Awer eichndlich war des ja
scho allerweil a weng so, dass mir unnere Konzebbde im Lauf der
Zeid verännerd hamm. Sozumsåch annalooch zu unnerm Lådn. Schdedich
und konsdannd, awer flexiewl und schdeeds a weng åbassd. Immer a
weng an derre Schdellschraum gedrehd sozumsåch. Zum enne isses
drodz derre Veränderungen edz amål widder an der Zeid, a Glosse
neizumschieb, ehm als Beleech für Konsdanz. Uff der annern Seid dud
sich des a echd åbied. Weil offnsichdlich annere in unnerer
Brångsche ned so flexiebl sin. Da gibbds nämmlich a Gschichdle, wo
ich euch unbedinggd verzähl muss. Ned blos, weils witzich is - des
wårs nämmlich am Åfang vei echd noch ned für mich - sonnern ehm a a
weng, um mir Lufd zum verschaff. Also bassds auf... Unner Lådn is
doll und mir hamm a dodål viel, brauch mer ned drüwer redd. Awer
unner Lådn is a ganz schö glee und ewn ned im Zendrumm. Deswechn
hamm mir a ned so viel vo dem Mördschndeis, wie zum Beisbiel des
Uldra in Nürnberch - oder Nemmberch, wie des die Nemmbercher
ausschbrech würd. Ich geh ja, wie ich scho öfder verzählt hab in
viele Gschäfdli, wo a weng so sin, wie unners. Hald so Nördlädn.
Und da kannsde fassd sowas wie a Fausdreechl aufschdell: Je
zendråler wo die gleechn sin, desdo mehr Mördschndeis. Un des Zeuch
läffd wie Hulle. Mir hamm ja in denne Neunzichern a mehr von dem
Zeuch ghabbd, awer irchndwie is des dann nimmer glaufn und deswechn
hamm mirs ausdröbfln lass. Und edz hammers hald fast blos noch auf
Beschdellung ghabbd. Dann kam noch der Corona-Scheiß, wo so Zeuch
goar nimmer gfråchd worrn is. Und desweechn ham mir da edz a lang
nix mehr bschdelld. Edz hadd ich awer des Jåhr a boar Gschbrächli
mid annern Lådninhabern, die wo mir a boar Dibbs gehm hamm, dass es
da was geb dud, was echd subber läffd. Nacherd hamm mir uns
üwerleechd, dassmer da a amål widder midmisch könnd. Wenns läffd.
Also auf die Seide vo unnerm Lieferandn gegliggd und auf Login
gedrückd. Passwörder sin noch alle gschbeicherd, also müss mer a
ned so enn Scheiß mid zurücksedz und so weider mach. Also voller
Vorfreude auf Login gegliggd. Kommd a Dexd. Ihr Akaund is
inaggdiev. Hä? Weechn längerer Inaggdividäd is unner Kondo
deaggdivierd. Mir solln uns annen Kundnsörwis wend. Mid Link. Na
guud. Doch ned so eefach. Dann hald a kurrze Middeilung gschriem
und wardn, was bassierd. Kann ja ned so lang dauern. Dess wår Ende
Februar. Ich habb dann vier Dåch gward, bis a emäil zurückkåm. Mid
der Fråche warum(?). Also warum mir widder unnern Ackaund
aggdiffierd hamm möchd. Ich dengg mir, na weil ihr Debbn nen
schdillgleechd habbd und ich was beschdell will, ihr Bananebiecher.
Schreib du ich awer ganz lieb und nedd, dass mir a Gschäfd sin,
früher scho immer bschdelld ham und edz a widder beschdell woll.
Ich machmer sogår die Müh noch a weng zum begründ, wieso mir edz a
Weile nix mehr vo derre gnommen hamm. Und dann du ich widder wardd.
Nix. A Woche lang gor nix. Börnie dud mich scho auslach. "Ruf hald
å". Såchder. "Ich wäss ned, ob ich freundlich bleib kå, wenn ich da
so an Debbe anner Schdribbe hab. Ich schreib ersd nochamål" Gsåchd,
gedan und gwardd. Widder a Woch. Kä Reakzion. Nacherd mennd der
Börnie, er dud edz amål åruf - und machd des a. Ich bin danewn und
griech alles mid. Is zwår a widder aweng a Gewerch, weil die Dåme
am Delefon kä Ahnung vo unnerm Fall had, ihr Kollechin gråd außer
Haus is und üwerhaubd. Awer nach enner Virddelschdund verschbrichd
die Dame, dass se sich drum Kümmerd. Mir soll eefach a weng wardd.
Mach mer dann a. Widder a Woche. Nix. Wie soll ich såch. Mir hamms
noch a boarmal brobierd. Bisher ohne Erfolg. Ich fass des edz amål
zamm. Bis nein Abril hammers noch brobierd. Resuldåd: fünf mäils
und zwä Årufe vo uns geechn enne mäil vo denne. Irchndwann hammers
nacherd aufgehm. Edz wäss ich nimmer, ob ich noch Bock hab, bei
denne üwerhaubd was zum beschdell. Ich männ des is ja ned so, dass
mir ned bezahld häddn oder irchndwas gschenggd ham wolln. Und die
Mindesdbeschdellmenge is eh a gråd ned ohne. Also habb ich kenne
Ahnung, was in denne Hirnwindungen vo denne Leud vorgeh dud. Ich
wäss eefach ned, ob mir zu glenne Fischli sin oder ob die eefach
blos zu blöd sin oder was a immer. Wie auch immer. Solcherde Sachn
dun ein manchmal scho a weng'n Schneid abkäff. Da griexde nen Dibb
vo a boar Kollechn, bissd moddievierd und nacherd kommd so a
Scheißdreck dabei rum. Seis drum. unner Lådn wird a so
weiderbeschdeh und unner Lehm a ohne den Lieferandn weidergeh.
Schad is blos wechn derre negatiefn Enerchie, wosde neigschdeggd
hast. Schwamm drüwer. An derre Schdelle had mer amål widder seh
gekönnd, wies auf derre Seidn als Kunde sei könnd. Wasn Glück, dass
ihr uns hab dud und ned die Debbe. Awer vielleichd sin mir eefach
die schlechdere Kundschafd wie ihr und uns ghörds ned annersch.
Wahrdscheins solld mer amål bei euch nachhorch, wie mir uns besser
varhald hätt gekönnd. Sozusåchn von Novizze zu Broffi... Und edzerd
wünsch ich euch a schönns Wochnend, und hoff, ich konnd euch a weng
zum Schmunzln brin. Weil mir gehds edz scho echd besser. Dschau
arrifiderdschi, euer Gerd