Drehbuch

Vom Låden und vom Leben Nummer 34 - Drehbuch (...wie immer zum
hören und mitlesen oder lesen und mithören, ganz wie ihr wollt) Vom
Låden und vom Leben (audiofile #34: Drehbuch) Servus ihr Liem dord
draußen, heud is amål widder mei Glosse drå. "Vom Lådn und vom
Leben". Na ja, vom Lådn is meisdens ned so viel drin, was ich in
derre Kadegorie zum såch hab. A diesmål würd ich des eher nei die
annere Richdung neisordier. Leben ehm. Obwohls a Menge Bücher zum
Deema gebb dud. Und ned nur des, sondern a Büchli und Comics, wo
des im Diddel für du. Es gehd heud nämmlich um des Deema
"Drehbuch". Und ja, da hab ich amål nei unnern Webschobb gelinsd
und jede Menge Dreffer gfundn. An Manga vo Hayabusa "Liebe ohne
Drehbuch", a boar Grimmis, wie zum Beischbiel "Drehbuch des Todes",
a e echds Drehbuch zum Glassigger "Das schweigende Klassenzimmer"
von Dietrich Garstka und gloar, jede Menge Sachbücher zur Deorie.
Was ich awer verzähl will is a Kino Erlebnis, beziehungsweise a
Nachkino-Erlebnis. Ich war mid a boar Leud im Kino. In Würzburch im
Zenrdål. Un der Film wår selwer a a Buchumsedzung. Vonnem Buch, wu
mir echd alle feiern dun, im Lådn. Des Büchle heisd "Mickey 7 - Der
letzte Klon" und der Film "Mickey 17". Wahrdscheins, weil sich a
grössere Zahl innem Film besser machd. Gibds middlerweile üwrichns
a bei uns im Shobb. Awer zu der Zeid war der ewn noch im Kino. Und
wie des hald bei so nen gesellichn Amnd mid Kinno und Freundn so
is, simmer danach noch lusdich zammgehoggd und hamm Manöfergriddigg
geübd. Ich war der ennziche, wo des Buch kennd had. Ja, ich hab a
Freunde, wo ned so viel nein Lådn gehn du und annere Gewohnheidn
hamm wie ich. Awer genau des find ich ofd dodål inderessand. Mir
alle fandn den Film echd gelungen. Die annern wolldn dann deilweise
gleich des Büchle käff und ich fands echd a saugud, OBWOHL ich des
Büchle kenn du. Und des is ja manchmal so a Sach. Awer um all des
gehds goar ned. S gehd ummen Sadz, denn wo ich zur Diskussion
beidråchn hab. Mir war als ennzicher Gridiggbungd die
Schdaadsführung, also sozumsach die Regierung a glenns bissle zu
üwerzochn sadierisch blöd dargeschdelld. Und ich mein so, dass des
in der Oard und Weise wie der Film aufbaud is scho bassd, awer
eichndlich durch des üwerzochn doofe fasd aweng unglaubwürdich war.
Nacherd sachd enner vo meine Kumbels eefach blos "Drambb". Und ich
so. "Verdammd". S is dann noch al lange, lusdiche Runde worrn. Mir
ham zum Beischbiel a üwer den Schenkelglobfer-Kuldfilm "Idiocracy"
vo 2006 geredd. Damals hamm mir uns verreggd glachd, awer
gleichzeidich a gmennd, dass des alles hald ausschlieslich in so
ennen Glamaugfilm neibass dud. Heud bin ich mir da nimmer so
sicher. Und da sach ich edz eefach blos "Drambb". Ja und in soanne
Richdung is nacherd des Gschbräch a abgedrifded und ein
Schlachwordd had sich seiddem bei uns durchgesedzd und wird immer
wieder zidierd. "Wenn ich des innem Drehbuch vorgsedzd griech würd
- und selber a Reschissör wär, nacherd würd ich des gladdwegg
ablehn. Unglaubwürdich!" Tja un edz simmer bein echdn Deema. Weil
wenn ich den kombledd unglaubwürdichn Mistkack, wo seid dem
Amdsandridd von dem "Drambb" gschenn is und gschied, in a Drehbuch
neischreib würd und des in der Zeid zurüggschick würd. Von mir aus
blos kurz, a boar Jährli, nacherd würd kenner so a Drehbuch käff.
Also es sei denn als bodenzielln zwäddn Deil von "Idiocracy"
vielleichd. Bei vieln Bloggbasdern aus den ledzden Jahrzehndn hab
ich gsåchd, was füra scheiss Drehbuch. Wenn die mir a boar Dollar
gebb würd, nacherd würd ich denn gern was bessers schreib. Dass
des, was edz in unnerer Realidäd schdattfind dud, neddamål füren
Schlefaz reich würd, is derård unglaublich, dass mir eefach blos
die Wordde fehln. Erinnerts ihr euch noch an "Zurück in die
Zukunft"? Da wird der Mardi dreisich Joar in der Vergangenheid
gfråchd, wer Bräsidend sei. Und der muss nacherd die Andword gebb,
Ronald Reagan. Was zu dem Brüller führd: "Was der Schauspieler?".
Wenn ich heud dreisich Joar nei die Vergangenheid wem verglär
müssd, dass enn kombledd grössenwahnsinnicher uralder Sagg, wo
rechdsgräfdich verurdeild is, wo diverse Firmen nein Bangrodd
gedriem had, wo a Schdurm aufs Kabidol angezeddeld had und was wäss
ich noch alles - dass der Debb Bräsidend is... Und dass der innem
Anfluch von geisdicher Umnachdung ennen ned wenicher
größenwahnsinnichn Muldimiliardär zu enner Ard Subbereidschend für
inderne Regierungsangelechenheidn machd. Des was jedz hald aggduell
so abgeh dud. Ich glebb, des wär noch nedd amål a Brüller worrn. Da
hädd wer bein Drehbuch schreim scho rechd viel Müh ghabbd, dass
dess nacherd widzich und ned kombledd unglaubwürdich rüwerkommd.
Ich muss echd sach, dass mir vieles, was in denn ledzdn Jährli
bassierd, wie a schlechder Film mid ennem groddnschlechdn Drehbuch
vorkomm dud. Da fälld mir blos dazu ein, dass ich in dem Fall sogar
gern auf die boar Dollar verzichd würd und gern umsonsd a Drehbuch
für die Fordsedzung schreib würd. Blos würd sich wahrscheinlich
kenner von denne dodåle Volldebbe an irchnd a Drehbuch hald. Dunse
ja edz scho nimmer. Des Drehbuch mid den Namen Demogradie had
wahrdscheins in a boar Jährli endgüldich ausgediend. Und all die
Debbn, wo mid an dem Mist verandwordlich sin, weilse solche
Arschgrambn wien "Drambb" wähl du, oder a bei uns solchn billichn
Raddnfängern wie denn vo der Aefde, oder üwer die Albn nüber der
Läga, denne Fradelli oder irchndennem annern vo denne billichn
Bobulisdn aufn Leim geh dun - all denne Debbn ghörds ned annersch.
Awer ich glebb ich und all die annern Leud, wo ned so saublöd sinn,
zum Beischbiel als Ausländer n "Drambb" gewähld hamm und sich edz
wundern, dasse geh müss, oder ihr Frau. Also mir und denn Annern
derf des ned Wurschd sein. Mir wolln des ned und mir müssn und
solldn uns laud und deudlich üwer des unglaublich schlechde
Drehbuch beschwern. Schliesslich is so a Kinobesuch heud a kä ganz
billiches Vergnüchn mehr. Da kå mer scho was für sei Geld verlang.
Deswechn aufgebassd beim Kinobesuch und der Karddenauswahl. A
schlechdes Drehbuch machd selbst die besdn Schauschbieler und
sbeschial Effeggds kabudd. Amål a schlechde Kinokarddn gekäffd hadd
awer noch bei weidem ned so die Draachweide, wie des falsche
Greuzle aufm Wahlschein. Oweh, edz bin ich widder ganz schö
abgeschwiffn. Vom Webschobb üwern Mickey 7 zur Bollidigg. Nacherd
solld ich wohl besser uffhör, für heud. Und desweechn Sach ich edz
in derre Schbrach vo denne Fradelli: dschau, arrifidertschi, euer
Gerd awer blos, weil ich immer noch glebb, dass mei Freunde vo der
Apeninn Halbinsel ned alle solche Brüder sinn.