Broffilierung des Brofiels?

Vom Låden und vom Leben Nummer 21 - Broffilierung des Brofiels?
Gedanken zu meiner Profilierungssucht und zur Berlin Wahl. (...wie
immer zum hören und mitlesen oder lesen und mithören, ganz wie ihr
wollt): Vom Låden und vom Leben (audiofile #21: Broffilierung des
Brofiels?) Hallo ihr Liem dord draussen. Ich möcherd euch heud a
Gschichdle verzähl vom mein vergangenen Sonndåch. Mir is da
nämmlich vonnem Kumbl ganz aggduell vorgworfn worrn, dass ich mich
ned so broffillier soll beziehungsweise hadder gmennd, dass ich
mich hald zu arch broffillier du. Mei Freund. Nacherd mussd ich mer
erschdamål mein Kobf zerbrech, was der männd. Also bezochn hadder
des auf unnern Boddkaasd. Ich wäss bis heud ned, was genau der
damid såch wolld. Mir wårn a scho nimmer ganz nüchdern. Und am
nächsdn Dåch hadders selber a nimmer gwussd. Ich hab mich hald noch
drann erinnern könn, dass mir des ganz schö gschdungn had und ich
immer widder versuchd hab, ausm rauszumgriech, wasser damidd mennd.
Awer ob er die Sach aufn Bunggd had bring könn und was der dann
war, wäss ich nimmer und wie gsåchd er kann mer a ned helf. Edz
griech ich des awer nimmer aus mein Kopf raus. Is eichndlich ned
wichdich und a ned schlimm, awer kennds ihr des ned? dass enner was
sach dud, was sich bei dir eibrenn dud? Wosde nacherd immer widder
drumrumkreis dusd? Edz könnd mer dess ganze ja a amål
süssdemaddisch ågeh. Broffillier is im Normålfall neggadief
vorbeleechd. Umgangsschbrachlich. Da schwingd so zeuch wie "sich
uffblaas", "sein Dätz nei jede Kammera neihald", "narzisdische
Geldungssuchd" und so a Zeuch mid. Ich muss da allerweil a immer
gleich an unnern Minisderbräsidendn dengg. Demm wo se a immer so
Zeuch vorwerf du. Üwerdriebenes Geldungsbedürfnis. Mag scho sei,
dass des für unnern Franggnmagiawelli ab und an a weng schdimm dud.
Is ja schließlich a Bolliddiger. Da mussde dich hald neis richdiche
Lichd neisedds damid die annern dich ned absedds. Awer ganz
ehrlich, je mehr ich drüber nachdenng du, desdo wenicher verschdee
ich des Wordd ansich. Gfühld had des doch was mid Brofiel zum du.
Und a Brofiel is ja eher bossidief beleechd. Markannd, deffinierd,
bosizionierd, greifbår hald. Mid nachvollziebårn Barrameddern. Was
mer sich eichndlich vonnem Bolliddiger blos wünsch könnd. Gloare
Bossizion, am bessdn innem verschdändlichn Sadzbau, kee
Drummrummballaver und wischiwaschi und vor ållm hald konsisdend.
Des hässd ned, dass mer kei Fehler zugebb dörff und noch viel
wenicher, dass mer aufm Weech ned a amål a Abzweichung nemm dörff,
awer mer solld hald kei Fähnle im Wind sei und wenn mer amål sei
Richdung wechsln dud, nacherd solld mer dess dransbarend und
fundierd begründ. Irchndwie bin ich glebb ich scho an dem besåchdn
Amnd schdändich auf Bolliddigg kommen. War der Amnd vom ledzdn
Sonndåch. Wässd scho mid derre Berlin Wahl, wosde eichndlich den
ganzn Amnd bloos Drummrummballaver ghörd hassd. Vielleichd is mir
des a genau desweechn so aufgschdoosn. Vielleichd wolld ich des a
so verschdee. Awer s wår hald so und ich kann des edz a nimmer
zurüggdreh. Wenn ich edz mid denne neun Asbeggde drüwer nachdengg
du. Nacherd könnd ich mer dess scho an die Brussd heffd. A Broffiel
versuch ich scho zum dransbordier. Also verbål nach aussn. A
Broffiel vo unnerm Lådn, vo unnerm Schonre vo unnern
Inderessnsgebiedn. Und gloar schbield da a relladief viel
subjeggdiefe Wåhrnehmung mid nei. Is ja å a Herznssache - ned bloos
unner Brooderwerb. Wenn ich dess schaff, a Broffiel zum vermiddln,
was audendisch rüwerkommd. Wenn ich dess schaff, a Broffiel derård
abzumbild, dasses ned bloos glaubwürdich sonnern a üwerzeuchnd
rüwerkommd und - und des is eichndlich des wichdichsde - a uffm
Brüfschdand von der zukünfdichn Realiddäd a noch eurer Kondrolle
vor Ordd schdandhälld, nacherd hab ich unnern Lådn doch eewandfrei
broffilierd!? Nacherd hab ich doch ålles richdich gmachd. Wieso
soll ich nacherd immer neis neggadiefe neirudsch, wenn ich hör,
dass ich mich broffillier du? Wardscheins, had des echd mid dem
schbezielln Amnd zum du. Weil ich an dem Amnd eefach bloß von allen
Seidn a gehaldloses Drummrummballaver ghörd hab, mid der Indension,
sich selber und odder die Baddei möchlichsd gud darzumschdell,
Fehler wem annersch nei die Schuh zum schieb oder eefach kombledd
zum Ignorier. Ich glebb mir gehd dess eefach unglaublich aufn Sack,
dass ich mich mid derre Äußerung auf des Niwoo gschdelld fühl. Ich
bin kee Bolliddiger, wo annem Bosdn gleeb dud. Ich bin kee
Baddeifungzionär, wo sich selber ned fesdleech kå, weiler Angsd hab
muss, dass endweder die Baddei oder die Wähler irchndwas falsch
verschdeh oder nein falschn Hals griech du. Gloar, gehd mir a ab
und an amål so, dass irchndwer mei Sädz nein falschn Hals griech
dud. Gråd, wenn ich amål ned gud glaund oder a weng frusdrierd bin.
Awer ich du nix såch, wasmer ned a mid mir im Lådn bersönlich
bereed könnd. Ich laber ned ummen heissn Brei rum, wenn ich a
Schlabbe griechd hab und - und dess is irre relewand - ich versuch
ned mei Fresse nei jede Kamera zum hald, weil mirs bersönlich dodål
wurschd is, wie Leud, wo ich ned kenn du üwer mich dengg du. Ich
hald mei Fresse nei die Kamera - also üwerdrachn - weil ich - wenn
ich scho jedn möchlichn Kanål bedien muss, um unnern Lådn, unner
Schonre und unner Subkuldur zum verkäff - dess dann a mid meiner
Moral mach möchd. Mid meiner Idee vonnem sinnvollen Weech, mid
meiner Idee von besserer Infraschdrugdur und mid meiner Idee vonnem
schönnerem Mideinanner. Glenne Gschäfdli in unnerer Schdadd ghörn
da genauso dazu, wie a Ausfluch in Nördlädn innerer annern Schdadd.
Ich glebb, dass des echd sowas wie a Brofiel is, wo mer unnerm Lådn
zuschreib dürff. Wenn a ned jeder des glebb muss, was ich verzabf
du, muss jeder glebb, dass ich des verzabf, weil ichs glebb.
Deswechn bassd des a zum Broffiel vo unnerm Lådn und is kee
Broffillierungssuchd von meiner Seide. Wenn ihr edz meind, dass des
a blos widder a Rumgekreise um mich gwesn is, nacherd kann ich blos
anreech, amål drüwer nachzumdengg, was mer allends die Woche für
ewich greisende Deemen sonsd so ghabbd hamm: Frühjåhrsoffensiefe im
Osdn, Berlinwahl in der Haubdschdadd, Glimmawandel (nadürlich),
vielleichd noch irchnd so a Nadsiediskussion im Osdn der Rebubligg
- was wäss ich. Wenn ich edz amål die bassndn Begriffe in der
Bollidigg dazu find möch, nacherd bassd am besdn Zöchern, Zaudern,
Sich im Greis dreh... also alles annere wie gloare,
nachvollziehboare und broffilierde Aussachn. Wardscheins had mich
des genau desweechn so angegaasd, weil ich mich mid so am Gewäsch
ned idendifizier lass möchd. Weil wenn ich um was rumkreis du,
nacherd sind des Werde, wo mir und unner Lådn a verdrehd könn. Und
wenn ich euch amål drauf aufmergsam mach dörff, ab und an sedzds a
Schläch nach aussn. Weil um mein Freund und mich und unnern
Schdreid, hädd ich ned so viele Wörder verwend müss. In so fern
wünsch ich euch a echd schönnes Wochnend und sach wie immer in
berfeggdn Idalienisch dschau, arrifiderdschie euer Gerd Thema:
Glosse Sprecher: Gerd