Züri Podcast Derby Archiv

Au am 30. Spieltag schaffeds die beide Mannschafte nöd. Niederlag Nummer 17 für den FCZ und 16 für d'Hoppers. De FCZ kassiert wieder ih de Schlussminute s'entscheidende Gegegoal und GC gaht im Schneegestöber vom Berner Oberland sang- und klanglos mit 5:1 unter.

Thun grüesst mit 71 Pünkt vom Ligathron. 74 Pünkt hend die 3 Zürcher Verein zäme - das seit eigetlich scho alles...

Da hilft nur no Galgehumor...

Spieltag 28 & 29 ih de Super League und es isch eh englischi Wuche zum vergesse! Vier Spiel, null Pünkt und die drü Zürcher Verein bildet 'Schlussliecht vo de Liga. Isches Ziet für en Trainerwechsel oder bringt das Ahleihe-Gschäft vom FCZ neue Schwung is Heereschüürli?

Das und wiiteri Theme werded ih de 7. Episode besproche - wie immer mit Humor und analytische Geniestreich

Beidi Zürcher Teams im Isatz: Beidi kassieret scho früeh Rot – aber d Story nachher isch komplett verschiede. GC erkämpft sich in Unterzahl gäge Lugano en Sieg. Und de FCZ zementiert sin Ruef als Ufbaugägner für kriselndi Teams i dere Liga. De Michel ertreit s'FCZ-Spiel live im Wankdorf umgebe vo euphorisierte YB-Fans. De Jan hät d'Schnauze gstriche voll vom Michel sine provokante Iwürf zum Zuschauerufkomme vo GC und rüeft zu meh Stimmig im Stadion uf.

Derby nachem Derby!

Zum 293. Mal treffed d'Grasshoppers und de FC Züri ufenand. S'Füürwerk vo de Fans übertreit sich nöd ufd Spieler und es isch über 90 Minute nur eh bescheideni Leistig vo beidne Mannschafte. Trotzdem chan sich de FCZ mitme 2:1 die 3 wichtige Pünkt sichere und schieled scho wieder richtig Top 6. GC hingege zementiert de unbeliebti Barrageplatz gwüssermasse.

Ih de 5. Episode luegemer im Detail uf das Spiel und choched namal Derby-Emotione uf. Mir stelled eus d'Frag obs das langsam gsi isch für de Gerald Scheiblehner, wer uf FCZ-Siite Matchwinner gsi isch und wies mit eusem Podcast wiitergaht, wenn GC würkli söt abstiige...

Für das Spiel brennemer: S'Derby staht vor de Tür und für beidi Mannschafte isch en Sieg Pflicht. FCZ wo besser ih de Tabelle dastaht aber mitere schwache Form. GCZ mit besserem Momentum aber 7 Pünkt Rückstand uf de FCZ.

Wer holt sich ih dem Spiel, voller Prestige und Emotione, die wichtige 3 Pünkt?

D'Vorbrichterstattig mitm Jan und Michel zum Stadtzürcher Derby vom 21. Februar 2026.

De diesjährig Valentinstag isch nöd nur de "Tag der Liebe" sondern au Spieltag 25 ih de Super League.

De FCZ muen sich mit 4:1 geg de FC Luzern gschlage geh und GC schaffts au mitm 9. Unentschiede die Saison nöd weg vom Barrage-Platz.

Warum die beide Trainer Hediger und Scheiblehner euse Podcast offesichtlich nonig losed und ih welli Spieler-DMs mir scho gslided sind, erfahreder ih de dritte Episode vom Züri Podcast Derby!

Spezialfolg am Dunschtig 12.02.2026:

Abstiigskampf pur am Zistig und Mittwoch 10. bzw. 11. Februar. Zwei möglicherwiis entscheidendi Spiel im wiitere Verlauf vo der bisher verkorkste Saison beider Stadtzürcher Verein. De Jan muen unfreiwillig in Letzi go Spiel luege und kämpft au en Tag danach noch mit de Müedigkeit vo dem müede Kick.